വെയിലുകൊണ്ട്‌ വെയിലുകൊണ്ട്‌
വിതച്ചതെല്ലാം കവിതയായി
മഴ നനഞ്ഞ്‌ മഴ നനഞ്ഞ്‌
മുളച്ചതെല്ലാം വെറുതെയായി

മഴ തുറന്നത്‌

മഴ തുറന്നത്‌
വേനല്‍ കുറ്റികളും
കൊളുത്തുകളുമിട്ടടച്ചു

കിളികളെല്ലാം
അമ്മവീടുകളിലെ
മാമ്പഴകൊട്ടകളിലേക്ക്‌
പറന്നു പോയപ്പോള്‍
ഊര്‍ന്നു വീണ
തൂവലുകളിലൊന്ന്
എന്റെ മനസ്സിലേക്കാണ്‌

ഹൗ.......
എന്തൊരു മഴയായിരുന്നു.
ഒരു കിളിത്തൂവലതാ
തെളിഞ്ഞുകിടക്കുന്നു.

ഓ.....
എടുത്തപ്പോഴെക്കും
അത്‌ പൊടിഞ്ഞേപ്പോയ്‌

ചോണനുറുമ്പ്

ഞാനൊരു ചോണനുറുമ്പ്‌
-----------------------
ആകാശത്ത്‌ നിന്നൊരു
നൂല്‌
തറ്റത്തൊരു പുഴു
താഴത്തൊരു തുമ്പ

കാറ്റിലാടിയാടി
നൂലിലൂടൂര്‍ന്നൂര്‍ന്ന്
തുമ്പക്കൊരു മുത്തം

അയ്യേ.........
ഞാന്‍ കണ്ടില്ലേ....
മിണ്ടില്ലേ.......

കണ്ടത്‌ മിണ്ടല്ലേ
കണ്ടാമണ്ടികരിങ്ങോടാ
.........................
നൂലെവിടെ?
കാറ്റത്‌ കൊണ്ടോടി

കൊണ്ടുകൊടുത്തത്‌
ചെമ്പരത്തിക്ക്‌
നാണം കോരി
പൂവൊന്ന് കുനിഞ്ഞേ
പിന്നയതോര്‍ത്ത്‌
ഇലകളാര്‍ത്ത്‌ ചിരിച്ചേ
അയ്യേ.........
ഞാന്‍ കണ്ടില്ലേ....
മിണ്ടില്ലേ.......
കണ്ടത്‌ മിണ്ടല്ലേ
കണ്ടാമണ്ടികരിങ്ങോടാ
--------------------
അയ്യേ ഞാന്‍ പുവ്വാണേ
-------------------
ഞാനൊരു ചോണനുറുമ്പ്‌
കട്ടുറുമ്പല്ലേയല്ല
-----------------

കരകള്‍ക്കിടയിലെ
കടലാണ്‌ പ്രണയം

കരയിലെ കണ്ണീരെല്ലാം
പുഴയായി
കടലിലേക്കാണ്‌

കണ്ണീരിന്റെ രുചിയാണ്‌
കടലിന്റെ ഉപ്പ്‌
----------------------

കരകള്‍ക്കിടയിലെ
വിടവല്ല കടല്‍
കടല്‍
കരയുടെ തുടര്‍ച്ചയാണ്‌
--------------------------

കര കടത്തിയ
ഓര്‍മ്മകളെല്ലാം
തിരകളായി
തിരിച്ചു വരും
--------------------------

പറയാതെ പോയ
വാക്കുകള്‍
മനസ്സിലൊളിപ്പിച്ച
നോട്ടം

അജ്ഞാതമായ വന്‍ കരകള്‍
നാവികാ
നിന്നെ കാത്തിരിക്കുന്നു
--------------------------

കുളിരലകള്‍ ഞൊറിഞ്ഞ പാവാടയണിഞ്ഞ
മഴക്കൊപ്പം
നൃത്തം ചെയ്താണ്‌
നീയെത്തിയത്‌

പ്രണയം

നേരിന്റെ സൂര്യമുഖം തട്ടുമ്പോള്‍
പെറാതെ മരിച്ചുപോകുന്ന
ഒരു മയില്‍പ്പീലി തുണ്ടായിരിക്കാം
എന്റെ പ്രണയം
പക്ഷെ ഓമനേ
എനിക്ക്‌ എന്റെ പ്രണയം
എന്റെ പ്രണയമാണ്‌

എന്റെ പ്രണയം
എന്റെ പ്രണയമാകുന്നു
കാണാതെ പോയ ഒരമ്മമ്മയുടെ
അറിയാതെ പോയ വാത്സല്യത്തിന്റെ
നേര്യതണിഞ്ഞുപൂക്കുന്ന
നന്ത്യാര്‍വട്ട പൂവുകളുണ്ട്‌

ശിഖര സഞ്ചയങ്ങളിലെമ്പാടും
വസന്തമാഘോഷിച്ചു നില്‍ക്കുന്ന
അരളിമരങ്ങളുമുണ്ട്‌

നിനക്ക്‌
ഒരു
നന്ത്യാര്‍വട്ട പൂവാകാമൊ
ഞാന്‍
ഒരു
അരളിമരമാകാം

ഞാന്‍ ഒരു സൂര്യനോ
നീ എന്നെ നിയതമായ ഭ്രമണപഥങ്ങളില്‍
വലം വെക്കുന്ന ഭൂമിയൊ അല്ല

മറിച്ച്‌
നമ്മുടെ പ്രണയം
മേലാപ്പ്‌ കിനിഞ്ഞിറങ്ങുന്ന മഴയും
മേല്‍ക്കൂര പൊളിച്ച്‌ പൂക്കുന്ന പൂമരവുമാണ്‌